E Gougleiz, e bro Felger, war an harz etre Breizh ha Bro-C’hall, e tremen ul lodenn eus ar gourhent A84. D’ar 14 a viz meurzh e voe ur fuzuilhadeg etre daou garr-tan o plantañ tizh war an hent-mañ. Ha n’eo ket gant pistolennoù dour o deus en em dennet an eil war egile, gant armoù otomatek ne lavaran ket ! Daou zen a zo bet gloazet er fuzuilhadeg hag unan a voe kavet kuzhet e bourk Gougleiz gant an archerien.
Pevar den a zo bet serret en holl. Tri faotr hag ur vaouez, tri anezho a zo gall a vroadelezh hag unan a zo aljerian. Tud eus rannvro Paris evel just hag anavezet mat gant ar justis. Un den toullbac’het e Vezin, e-kichen Roazhon, a zo bet aterset gant an archerien, memes. War a seblant e vefe en afer eñ ivez.
Barnet e vo ar vandennad d’an 8 a viz gouere.
[cc] Breizh-info.com, 2024, dépêches libres de copie et de diffusion sous réserve de mention et de lien vers la source d’origine
