E Bro-Skos, n’hall ket ar gouarnamant emren aozañ un eil referendom war an dizalc’hiezh. N’en deus ket roet Boris Johnson e asant pa oa e penn Westminster. Hervezañ e oa “er-maez lezenn” an Indyref2.
Savet en deus klemm an SNP ha setu an afer erruet dirak lez-varn meur ar Rouantelezh-Unanet. E miz eost en doa reklemet ar strollad SNP da vezañ aotreet da reiñ e arguzennoù en afer. D’ar 07 aviz gwengolo e asantas al lez-varn meur e kemerfe perzh ar strollad politikel dizalc’hour er prosesus. E berr komzoù : droad en do an SNP da ginnig un doser a 20 pajenn a-benn an 21 a viz gwengolo. D’an 11 ha 12 a viz here e vo sellet ouzh an afer en he fezh gant al lez-varn meur.
Estreget an SNP a c’hello kinnig e arguzennoù, avat. Ar gouarnamantoù skosad ha breizhveuriad o deus urzh da reiñ o ali met ivez Keith Stewart, ar breutaer meur evit Bro-Skos e-barzh ar gouarnamant breizhveuriad (seurt kuzulier war ar Gwir skosad e kabined ar ministr kentañ breizhveuriad).
D’an 28 a viz even e oa bet kinniget e steuñv evit un eil referendom war an dizalc’hiezh gant Nicola Sturgeon, anezhi ministrez kentañ Bro-Skos. Abaoe-se, emañ an afer dirak al lez-varn.
[cc] Breizh-info.com, 2022, dépêches libres de copie et de diffusion sous réserve de mention et de lien vers la source d’origine
