D’an 10 a viz gwengolo en em dolpas un 200 bennak a dud e Stredell, e-kichen Gwitreg, war tachenn mell-droad ar gumun. Fellout a rae dezho sevel o mouezh a-enep ur raktres a gourmarc’had (1000 m²) nevez hag a zo sañset bezañ savet… war an dachenn !
Abaoe 2019 e klask ar vaerez staliañ ar gourmarc’had en he c’humun war-zigarez e vo muioc’h a labour e Stredell a-drugarez dezhañ. Ha padal ez eus ur c’hoksimarket e kreiz kêr, ar c’houplad a ra war e dro abaoe 13 vloaz a zo ankeniet gant seurt raktres met ne vern ! A vloaz da vloaz emañ ar gumun o kreskiñ ha mennet eo ar c’huzul-kêr da gaout “e” c’hourmarc’had dezhañ… hag a dalvezo da falc’h an Ankoù evit ar c’hoksimarket ha meur a stalig all eus kreiz kêr Stredell, ken sur ha tra.
“Forzh petra !” a respont ur strollad a dud anvet “Carton Rouge”. “N’emaomp ket pell eus Roazhon, Gwitreg pe Laval, e-lec’h ma’z eus forzh gourmarc’hadoù dija”. Hervez ar strollad “Carton Rouge” ez aio war-baouraat staliouigoù ar gumun gant seurt gourmarc’had.
Ur petision a zo bet lañset gant Carton Rouge.
[cc] Breizh-info.com, 2021, dépêches libres de copie et de diffusion sous réserve de mention et de lien vers la source d’origine
