Goude ur sizhunvezh a drubuilh e lise Diwan Karaez e vefe dirouestlet an afer. Savet o doa ar liseidi o mouezh ar sizhun paseet abalamour d’o c’hoñdisionoù labour ha bevañ. Re nebeut ar salioù, Oaled ebet, toulloù er c’houskva, yen an dour d’ar mintin e oa hir evel un deiz hep butun roll reklemmoù ar re yaouank. Ar Rannvro hag ar gevredigezh « Ailes », bet fiziet enni meriñ domani Kerampuilh gant ar Rannvro, o doa tennet droug ar liseidi deuste. Ur « blokus » a oa bet votet gant ar re yaouank memes hag e oant en aviz kenderc’hel gant ar stourm ar sizhun-mañ c’hoazh.
Met, e-pad ar sizhun e oa bet forzh emvodoù ha taolioù telefon etre ar rannvro, ailes ha Diwan. Ha direustlet e vefe an afer hervez ur gemenadenn bet kaset digwener gant renerezh ar lise. Ar gemenadenn evel m’emañ :
« Goude meur a emvod hed-ha-hed ar sizhun eo bet kavet un diskoulm da-c’hortoz evit Dilun.
Prestet e vo deomp ur sal e kastell Kerampuilh (anvet an oditorium) evit ma vefe staliet un Oaled.
Digor e vo diouzh un implij-amzer a vo savet gant ar vuhez skol dre ma rankomp kaout un den gour, unan d’an nebeutañ, e-karg anezhañ.
Staliet e vo peadra da vuhezañ anezhañ tamm-ha-tamm gant sikour al liseidi. Ul lec’h dudiañ e vo dreist-holl.
Ar self a chomo digor evit ar re a fell dezho labourat pe bezañ en ul lec’h siouloc’h. Al levraoueg ivez, met gant reolennoù strishoc’h evit ma zo bet betek-henn.
An diskoulm-mañ a zo bet kinniget deomp gant ar Rannvro evit ma c’hellfe ar gevredigezh Ailes en em aozañ evit prientiñ un dachenn a zegemero ur sal fiñv-difiñv a vo feurmet ganeomp (Lise Diwan Karaez) evit degemer un Oaled “wir” adalek distro ar vakañsoù Ebrel betek fin miz Even.
Ar steuñv-mañ a zo evit leuskel amzer deomp da brederiañ evit an distro-skol e miz Gwengolo ha studiañ dre benaos e vo posupl implijout ar savadur nevesaet (B3) ha pegement e kousto deomp.
Gant-se e c’hellfe buhez al lise dont en-dro da vezañ sederoc’h hag ar c’hentelioù kregiñ en-dro. Kinniget eo bet d’al liseidi en emvodañ ur wech an amzer bep sizhun evit heuliañ an afer ha bezañ kelaouet war araokadennoù an teuliad. »
Mersi da JLT evit ar gemenadenn.
Crédit photo : DR
[cc] Breizh-info.com, 2025, dépêches libres de copie et de diffusion sous réserve de mention et de lien vers la source d’origine
