Gwechall e c’hoarveze seurt afer er c’hêrioù bras nemetken, E Pariz, Grenoble pe Marseille, bremañ e c’hoarvez e kumunioù bihan. E Sant-Loheñvel, e Bro Daoudour (Bro Dinan), e oa bet bazailhet ur c’houplad gant daou zen d’ar 6 a viz genver 2024. Degouezhet e oa an daou drafikour e ti ar c’houplad peogwir e tlee an daou bichon 7000€ a zramm. Pennoù kokain e oant ha n’o doa ket restaolet o fourvezerien. Er bed-se ret eo distagañ e zle !
Abel ha Joachim, an daou drafikour, o deus pep a roll lez-varn hir ha lart : 10 menneg evit an eil, eizh evit egile. Met n’int ket gwall fin. Pa voe arruet an archerien ha familh an daou benn dramm e oant c’hoazh en ti ! Ha leun a wad ar c’houplad, astennet war al leur. Dont a reas a-benn Abel ha Joachim da dec’hout kuit met ne voe ket diaes d’an archerien lakaat an dorn warno un nebeut d’ar goude.
Dirak an archerien ha dirak ar barner e nac’ho an daou drafikour bezañ graet o stal d’ar c’houplad. « N’eo ket me, n’eo ket me ». Met graet o deus mat an archerien o labour ha prouennoù a zo war an daol.
A-benn ar fin e vo kondaonet Joachim hag Abel da bemp bloavezh toull-bac’h gant lez-varn Sant-Maloù d’ar 4 a viz du.
Illustration : DR
[cc] Breizh-info.com, 2024, dépêches libres de copie et de diffusion sous réserve de mention et de lien vers la source d’origine
