Jeannine a oe é chom er Morbihan. En ur gumun vihan pell-mat ag an ospitalioù. 75 vlez e oe. Get klub ar re gozh e yeas d’ar “Ferme du Monde” e Karantoer, ur seurt park mah eus loened bras (lamaioù, chamoioù, ….) é pourmen digabestr. E vale ‘ba’r park e voe piket get un dra bennak. Un naer peotramant ur c’hwil bennak ? Den ne ouia. Fonnabl-tre e santas ne yae ket mat an traoù geti. Ha kaset kerkent d’un ospital ag ar Morbihan.
E Gwened e chomas un nebeut deiziadoù. René, he gwaz, bet labourer douar, oe ‘b’ar gêr é c’hortoz e Jeannine. Un deiz e sonas an telefon : “me an hini eo, lâret o deus din e oen aveit distreiñ d’ar gêr”. “Ha ma…” a soñjas René, “setu un dra vat. Pareet eo sur-mat”.
Met hemañ a welas un ambulañs o vont-tre e penn e alez : Jeannine oe astennet àr ur gravac’h. Ne oe ket aveit kerzal. Foeñvet-abominabl e oa he garr ! Biskoazh gwelet unan ken foeñvet. “Met a-gaoz da berak o deus da gaset d’ar gêr er stad-mañ” a c’houlennas René. “Ne oa ket mui plas en ospital” a laras Jeannine.
Jeannine he doe poan. Telefoniñ a reas René d’ar bomperion en-dro. Ne gouske ket mui Jeannine. Ha padal en ospital ne gouske ket kennebeut kar ne oe ket bet roet dezhi he vekanik a-enep “apne ar c’housk”. Skuizh-marv e oe !
Kaset e voe d’an ospital en-dro. Met ne oe ket medisined ha klañdiourion a-walc’h an deiz-mañ. Chom a reas àr ar gravac’h e-pad euriadoù. den ebet é gober àr he zro. Poan e oe. A-benn ar fin e varvas he-unan. Hep René, hep he bugale, he-unan en un trepas trist. E-leiz a estrañjourion a oa an deiz-mañ, un bouchad a zo tremenet araozi. Jeannine he doe labouret en ti-feurm ha roet argant da Frañs e-pad blezadoù koulskoude.
D’an noz, a-raok monet da gousket e tintas telefon ar gêr. Ur medisinour a laras da René e oa aet d’an anaon e wreg. Hag eñ da ouzhpenniñ : “lazhet hon eus anezhi aotroù ‘m eus aon”.
René a zo ur paizant ag ar Morbihan. Ar lezennoù, an avokadoù, ne ouia netra ‘ba se ! Ne yay ket pelloc’h kar re a c’hlac’har en deus ha n’eo ket un “aotroù” hag a ouiahe pe mod gober.
C’hoarvezet eo an istoer-mañ ur miz zo du-mañ.
Crédit photo : DR
[cc] Breizh-info.com, 2024, dépêches libres de copie et de diffusion sous réserve de mention et de lien vers la source d’origine