Bep hañv e teu meuriadoù ha meuriadoù termajied d’en em staliañ e bro Naoned, tro Sant-Nazer dreist-holl, a bep bloaz zo aferioù a seurt-se : maer Sant-Andrev-an-Doureier en deus savet klemm evit bezañ bet gourdrouzet gant beajourien hag o deus en em staliet war stad mell-droad ar gumun d’an 11 ha 12 a viz gouere.
D’an 11 a viz gouere e voe souezhet tud Sant-Andrev o welet un daou-ugent bennak a garavanennoù oc’h en em staliañ war ar stad mell-droad. Diouzhtu e erruas ar maer evit lavar dezho n’eo ket reizh ober se hag e vo savet klemm gant ar gumun. Kinniget zo bet dezho en em staliañ war lec’h Erbigneg, ar pezh a nac’has an dermajied. Perak ? Peogwir zo fachiri etre meuriadoù zo a-wechoù ha n’int ket evit kenvevañ war ul leur-degemer bennak. Ouzhpenn-se gant ar glav a zo kouezhet stank war Breizh abaoe sizhunvezhioù e vez leun a zour leurioù-degemer zo. Met kelaouet eo bet ar meuriadoù termajied a-raok e kemerfent penn an hent. Gouzout a ouarent mat ne oa ket ar c’humunioù evit degemer anezho ar bloaz-mañ !
D’an 11, pep hini a zifennas e grampouezhenn ha buan e treñkas ar soubenn etre ar maer hag an dermajied. Betek ma vefe graet ar gourdrouz dezhañ eus poanioù an ifern gant reoù zo.
Ha ne sioulas ket an traoù goude-se rak antronoz e tegouezhas un ugent bennak a garavanennoù war parkva an “Espace du Marais’, ur sal degemer !
Dipitet eo ar maer rak n’eo ket bet kaset bagadoù archerien evel er Baol un nebeut deizioù a-raok. Perak ? Peogwir n’eo ket Sant-Andrev leun a barizianed ha tudoù uhel er mare-mañ ? Tud ha ne fell ket dezho bezañ direnket gant al “lieseurted” ?
Illustrations : DR
[cc] Breizh-info.com, 2024, dépêches libres de copie et de diffusion sous réserve de mention et de lien vers la source d’origine
