Daoust d’ar manifestadegoù, levrioù hag emvodoù foran diwar-benn ar c’hudennoù lojañ evit ar Vretoned, kendalc’het e vez da sevel pe da werzhañ lojamantoù evit ar re binvidik e Breizh. Er Baol lakomp ez eus bet priziet 3,5M € (30 000€/m²) ur ranndi a 113m² gant div ajañs eus Paris. Ha n’o doa ket gwelet ar ranndi a-raok e briziañ memes !
Labourioù a oa d’ober e-barzh ha n’eus ket karrdi evit an oto met ne vern, tud zo a zo prest d’en em lakaat war an noazh evit kaout seurt madoù.
A-benn ar fin eo bet gwerzhet 2 460 000€ d’ur parizian gant un ajañs eus Ar Baol.
Ha perak n’o deus ket droad ar vretoned kaout seurt lojamant “gwel war vor” evit prizioù dereat ?
E Dinan, pemp miz zo, e oa bet lakaet e gwerzh presbital kozh ar blasenn Saint-Saveur gant an ti-kêr. Prenet eo bet 666 000€ gant Nessence un stroll eus Bourdel. D’ober petra ? Ul leti mod “krec’h ar skalfad”, 4 steredenn ha tout.
Ha perak n’eo ket bet renevezet an ti-mañ evit lojañ familhoù eus ar vro, tud o labourat e kreiz-kêr Dinan da skouer ?
Ha gwelloc’h c’hoazh : an Ti Pavie -un ti-kozh eus Dinan, m’eo ar stroll Castelbrac perc’henn warnañ- hag a zo just e-kichen ar presbital kozh en deus prenet ul liorzh a 120m² evit brasañ plijadur e bratikoù pinvidik. Parizianed pe estrañjourion all evel just !
Hag ar Vretoned eus an renkad etre pe renkad ar labourerien ? Ha droad o deus prenañ tiez e kreiz-kêr Dinan pe rankout a ra ar “vilains” annezañ dre ret er “c’harterioù” gant poblañsoù all hag a “binvidiko” anezho ?
[cc] Breizh-info.com, 2023, dépêches libres de copie et de diffusion sous réserve de mention et de lien vers la source d’origine
