E parkoù Breizh e weler saout e-leizh. Met n’eo ket gouennoù Breizh evel gwechall rak Prim’Holstein eo an darn vrasañ anezho. Ur meskaj a ouennoù. Ne weler ket mui buoc’hed Naoned pe brizh-du, siwazh.
Abalamour da dud entanet gant gouennoù ar vro zo bet savetaet saout Breizh. Hag a vloaz da vloaz e vez ganet un niver dereat a bennoù chatal nevez. Evit saveteiñ ar gouennoù kozh.
Er bloavezhioù 60, da skouer, ne oa ket mui a saout brizhruz Karaez koulz lavarout. Met, ur c’houplad a vretoned harluet en Dordogn o doa kaset ganto un dropellad a saout vrizhruz. Diwar an tropellad-se e teuas a-benn skiantourion an UBO, Skol-Veur Breizh-Izel, da adsevel an ouenn. Ken eo bet lakaet peder anezho o peuriñ e traonienn Hyères e Karaez gant an ti-kêr. Ha d’an 13 a viz here e alas “Joséphine”. Ha setu ganet “Unan ruz” (e anv) ! An hini kentañ ganet e Karaez abaoe ar bloavezhioù 60 memestra !
An “Arvorigenned” a oa un ouenn a saout breizhad all. Tro Menez Arre, Pondi, Loudia a veze gwelet anezho gwechall. Nevez zo eo bet marilhet “Tayga”, ar 1000vet parez eus an ouenn, bet ganet e miz even 2022 e Plerger e Bro Sant-Maloù ! Abaoe miz meurzh emañ an Tayga-mañ e Sant, e Bro-Zol ma vo lakaet d’ober reoù bihan d’he zro moarvat.
[cc] Breizh-info.com, 2023, dépêches libres de copie et de diffusion sous réserve de mention et de lien vers la source d’origine
