Evel bep hañv setu karavanennoù a vil vern oc’h en em staliañ e bro Naoned. Ha n’eo ket karavanennoù touristed anezho ! Misionoù protestant a vez aozet e lec’h-mañ-lec’h evit an dermajied meur a wech met gwechoù all ez eus bodadegoù ha ne gomprener ket ar rak hag ar perak anezho. Kevezerezh a zo etre meuriadoù termajied zo ha, dre-se, n’hallont ket kenvevañ war ar memes tachenn. Dre-se e tle an dermajied bezañ war div zachenn disheñvel. Euredoù a vez aozet d’an hañv ivez hag a laka meur a veuriad d’en em dolpañ en ul lec’h re strizh evit tout ar c’haravanennoù. Alese e vez skwatet tachennoù publik pe prevez gant meuriadoù zo diar-goust tud ar vro evel just.
Setu ar pezh a c’hoarvezh er mare-mañ e Gwagenez e Bro-Raez. 70 karavanenn a zo en em staliet war an dachenn mell-droad hep goulenn tamm aotre ebet ha goude bezañ torret ar gloued ! Ur stadad a zo bet graet gant un urcher diwar c’houlenn an ti-kêr. Memestra e Sant-Mikael-Keveger m’emañ staliet un dek bennak a garavanennoù war an dachenn mell-droad ivez abaoe… div sizhunvezh ! Savet he deus klemm Pornizh Agglo.
E Gwerzhav, tostoc’h eus Naoned, e troas trenk ar soubenn disul tremenet etre an aotrou maer, Rodolphe Amailland, ha termajied zo pa klaskas paotr kentañ ar gumun mirout an dermajied a en em staliañ war un dachenn eus ar Grolerie. Hervezañ e vefe bet “kunujennet” ha “taolet d’an traoñ” memes. En desped d’e gourach, 200 karavanenenn o deus en em staliet war an dachenn ! Hag emaint eno c’hoazh !
Dimerc’her, div bolotennad a archerien a zo degouezhet mintin c’houloù en dachenn ha tapet krog en daou zen hag a vefe diskred warno bezañ lammet gant Rodolphe Amailland.
[cc] Breizh-info.com, 2023, dépêches libres de copie et de diffusion sous réserve de mention et de lien vers la source d’origine
